चार दिवसांत धान खरेदी सुरू न झाल्यास आंदोलनाचा इशारा
बामणी केंद्रावरील धान खरेदी रखडली; ३०० शेतकरी अडचणीत
सिरोंचा : 3 जून
बामणी हे परिसरातील धान खरेदीचे प्रमुख केंद्र असून या केंद्राच्या कार्यक्षेत्रात अनेक गावांचा समावेश आहे. या गावांतील सुमारे ३०० शेतकरी आपल्या धान विक्रीसाठी बामणी केंद्रावर अवलंबून आहेत. मात्र अद्यापपर्यंत धान खरेदी प्रक्रिया सुरू न झाल्यामुळे शेतकऱ्यांमध्ये तीव्र नाराजी निर्माण झाली आहे.
मागील वर्षी या परिसरातील शेतकऱ्यांचे धान शासनमान्य सोसायटीमार्फत खरेदी करण्यात आले होते. चालू वर्षातही शेतकऱ्यांनी आपल्या शेतातील धान पीक काढणी करून विक्रीसाठी तयार ठेवले आहे. मात्र संबंधित सोसायटीकडे धान साठवण्यासाठी आवश्यक गोदाम उपलब्ध नसल्याचे कारण देत खरेदी प्रक्रिया अद्याप सुरू करण्यात आलेली नाही.
सध्या पावसाळ्याचा कालावधी सुरू असून मोठ्या प्रमाणात धान उघड्यावर साठवून ठेवण्यात आले आहे. त्यामुळे अवकाळी पाऊस किंवा प्रतिकूल हवामानामुळे धानाचे नुकसान होण्याची भीती व्यक्त केली जात आहे. वर्षभर अथक परिश्रम करून घेतलेले पीक वेळेत विक्री न झाल्यास शेतकऱ्यांना मोठा आर्थिक फटका बसण्याची शक्यता आहे. त्याचा परिणाम शेतकऱ्यांच्या कुटुंबाच्या उदरनिर्वाहावर होणार असल्याची चिंता व्यक्त होत आहे.
शासनाने जाहीर केलेल्या हमीभावाचा लाभ शेतकऱ्यांना वेळेत मिळणे आवश्यक असताना धान खरेदी प्रक्रिया सुरू न झाल्याने शेतकऱ्यांमध्ये अस्वस्थता वाढली आहे. त्यामुळे प्रशासनाने तातडीने हस्तक्षेप करून बामणी केंद्रावरील धान खरेदी प्रक्रिया सुरू करावी, अशी मागणी करण्यात आली आहे.
तसेच पुढील चार दिवसांच्या आत धान खरेदी प्रक्रिया सुरू करण्यात आली नाही, तर परिसरातील सर्व शेतकरी लोकशाही मार्गाने धरणे आंदोलन करतील, असा इशाराही शेतकऱ्यांनी दिला आहे.
Post a Comment
0 Comments